Des empfinden schwech unnd sterck
Item: wann Ir mit dem zufechten zusamen kament, so sez deinnem rechten fuoss vor unnd haw Im entgegen und Inn dem anpund so empfind ob er waich oder hert senam seinnem duseggan, Ist er hert unnd hellt dir starch wider, so volg mit deinnem lincken schenckel hinnach unnd lass die schwech behend lauffen unnd haw Im nach seinnem haupt seinner rechten seitten, hawt Er dir dann also oben zu unnd du dich auch gogen Im hawst Imm das anpunden deinnen rechten fuoss furgesezt, so volg mit dem lincken hinnach und versez Im seinnen haw mit der sterck deines Duseggens, Indes trit mit deinnem recthen schennckel vor der wider hinnein und haw Im nach seiner lincken seiten, versezt dir das, so zeuch den rechten fuoss wider zuruck und stich Im zu seinnem gesicht, sticht er dir dann also nach deinnem gesicht, so nimb den stich hinweck mit deinner kurzen schneid unnd schneid Im mit lannger schneid nach seinnem angesicht, schneidt Er dir also nach deinem angesicht, so fatt Im Krump ein, so hastu den schnit als gut als er unnd magst mit Im arbaiten alle vorige stuck.
