Der entrusthaw gogen dem oberhaw
Item schich dich also mit dem Entristhaw steennt deinnem lincken fuoss vor unnd halte dein duseggen auf deinnem recthen knie mit dein hefft das der Ort gegen dem ajann gewenndt sey, hawt Er dann deinner obern vloss zu, so volg mit deinnem rechten fuoss hinnach unnd gee mit dem duseggen auf ober dien haupt das die lanng schneid oben gewenndt sey, so ist Im der haw versezt, Indes haw dich behendiglich Inn die zwirch nach seinnem rechten Ohr, zwirch er dir dann also zu deinnem rechten Ohr und du mit deinnem rechten fuoss vor stesst, so versez Im das mit deinner lanngen schneid und volg mit dem lincken fuoss hinnach, lass Inn dem behend ablauffen und haw Im nach seinem rechten Arm, versezt Her dir das furbas, so raiss Im zwifach nach mit ainnem stich nach seinnem gesicht oder der prust begert, Er dir dann also nach zuraisen , so trit mit deinnem rechten schennckel zuruch und haw Im Indes zwifach nach seinnem haupt, Hawt er dir dann zwifach nach, so trit mit deinnem rechten fuoss fur seinnen lincken unnd wind mit deinner kurzen schneid auf sein lannge auf sein lincke seitten, Indes schneid Im nach seinnem gesicht oder dem hals.
