Nun merck uff dissen puncten der ist notturfftlich zuo uerstend
Item des ersten So soltu den maister wol erkennen der dich lerren wil dz sin kunst recht und gewer sy und dz er frum sy und dich nit veruntrüwe und dich nit verkürtz in der lerr und wiß die gwer zü zebraitten da mit er kempfen wil.
Och sol er den maister nit uff nemen
er schwer im dann sin frumen zwerbent
und sin schaden zwendent
deß glich sol er dem maister wider um sweren
sin kunst nit witter zleren.
Hie merck uff den maister
Item der maister der ain understat zu leren, der sol wißen daß er den man wol erken, den er lerren wil, ob er sie schwach oder starck, und ob er gäch zornig sÿ oder senftmüttig, och ob er gütten auttem hab oder nit, och ob er arbaitten müg in die in die harr; und wenn du inn wol erkanet haust in der lerr, un wz arbait er uermag darnach müstu in lerren dz Im nütz ist gen sinen vind. Och sol der kempffer und der maister sich hütten dz sie niemand zu sehen laussend und In sunder sie gwer da mit sy arbaittent und sich baid hütten vor vil geselschafft und von dem vechten wenig sagen dz kain abmercken da von kom.
von kuntschafft
wie der kempffer und der maister kuntschafft möchte hon zu rem widertail, wz sin wesen wer, ob er sÿ starck oder swach, ob er och sÿ gechzornig oder nit, und wie sin touff nam hieß, ob man wölt dar uß bratticiern oder rechnen. Es ist och nottürfftig zu wissen wz maister in lerr dz man sich darnach müg richten
wenn er nun gelert ist und in den schrancken sol gon
So sol er zu dem Ersten bichten, dar nach sol Im ain priester ain meß lesen von unßer frowen und von sant Jörgen, und der priester sol Im segnen sant johanns mynne und dem kempfer geben. Dar nach sol der maister In ernstlich versüchen
