Item hawt einer ein oberhaw uff dich von seiner rechten so fang in sein streich mit einem gegen streich in auff streichen von deiner rechten in der luft mit langer schneid in dem es noch riret so schlag umb mit der zwirch zu seinem lincken ohr, geht auch zu beiden seitten Merck wan du also uff streichest in das lang orth, so hastu den absatz gegen die 4 wind welche zu allen seitten gehn, Nemlich hawt er von oben, so streich von unden in sein schwerdt, und bleib ihm band hartt, such indes mit winden schnellen, Merck auch indes und fhul wan er abgehen wil, so baldt er abgeht umb zuschlagen, so volg ihm nach und schnel ihm von oben vber sein arm mit verwentter klingen, das in schnellen die lang schneid gegen seiner klingen sthe, schlag behend umb mit der flech gegen ubererck zu der nechsten bloß, schaw zu das du bald ahn seiner klingen wider seyest hawt er aber unden so sperr ihn von oben es sey mit absetzen oder uffsitzen, so offt es glitscht so biß behend bedacht der nechsten bloß zu. ¶
Ein ander stuck
Streich dem man gewaltig durch sein gesicht ubersich durch tritt dem streich nach zu dem man mit deinem rechten fuß und laß dein schwerdt vmbschiessen und setz ihm den orth in sein brust zwuschen sein armen bewar dich mit der sterck uber deinem haubt, und merck in dem, oder so baldt er sein schwerdt zu weit in das lang orth gibt, so greiff mit dem orth aussen uber sein arm. ¶
