Doppel solt den feler machen
Dergleichen thrit und schnidt zweifachen
Der feler ist ein guth stuck gegen die fechter die gern versetzen, als wan du einer bloß zu hawest, und merckest das er dem haw nach wuscht zu versetzen so lastu den haw fehl abgehn, und schlest einer andern bloß zu. Doppell fellen ist ein kunstreich stuck, und gehert ein geubter fechter darzu, aber ich wil dir etliche stuck darauß du villerley feller wol lernen kanst setzen.
Item in zufechten schick dich in die zornhutt zur rechten, als baldt er sein schwert in die luft bringt, so haw von deiner rechten umb den kopf mit langer schneit und ausgestreckten armen zu seiner rechten seitten fehl, und traw ihm die zwirch zur lincken laß nicht riren, sonder wider umb den kopf und haw mit langer schneid das sich die flech dapfer einschwing zu seim rechten ohr, itzt verkher schnap umb laß verfligen. ¶
Item in zu fechten haw ein langen oberhaw zu seiner lincken obern blöß wan du mit dem haw oben in der luft schier an sein kling rirest, so verwandle den oberhaw in ein zwirch und schlag ihn mit der zwirch von unden zu seinem lincken ohr oder armen, das geht zu beiden seitten.
Ein feler mit dem falschen thrit.
Item in zufechten thu ein hohen oberhaw und wan dein kling schier in sein kling riret, so bald verwendel den oberhaw in ein zwirch und gleich mit der zwirch thrit, thrit mit dem rechten fuß zwischen dir und ihm beseits auß durch uff sein recht seitten, laß bald wider umbschnappen, und schlag ihn mit kurtzer schneid zu seim rechten ohr, das dein hend in streich kreitzweiß seindt oder haw mit langer schneid nach und spring ihm streich wol uff sein recht, beseits auß.
