so schnel ihm mit dem kurtzen schneid wider zu seinem lincken ohr, und in schnal thrit mit dem kinck fuß zu ruck hinder dein rechten. ¶
Auch so du recht durch schiessen wilt
krump kurtz durch wechsel ahn sein schilt.
Daß ist ein recht meister stucklin. Wan du in zufechten bist, so schick dich inn rechten zorn. Als bald er sein schwerd in die luft bringt, so haw einen freyen oberhaw zu ihm, und in der luft verschrenck dein schwerdt, das dein hend kreutzweiß (die recht uber die linck) khommen, und haw als mit kurtzer schneidt krump gegen seinen. Haw[1] lustiglich durch, in dessen thrit wol mit einem zwifachen thrit uff sein recht auß und haw mit der langen schneid zu seim rechten ohr, oder khumme also mit dem durchwechslen ahn sein schilt, gegen seiner rechten. Also arbeit mit winden schneiden, und was dir fur arbeit werden mag. ¶
Ein frey lauffent stuck auß dem durchschüssen.
Im zufechten hab acht, wan oder in dem er sein schwerdt uff zieht zum streich so haw behend und lustig vor ihm durch, wie oben gelertt, das du uff seiner rechten ahn sein schilt kemmest, so baldt es riret, so winde ihm also die kurtz schneid entwedert zum kopf, und in winden ruck den knopf wol ubersich das die kurzt schneit tief kombt, fert er uff und versetzt, so laß dein kling wider umbschnappen, das dein hend kreutzweiß, die recht uber die lincke khomme, schnel also mit geschrenckten henden, in umbschnappen wind unden hinein zu seim rechten ohr, thrit zu gleich mit dem lincken fuß wol auß uff sein recht in schnell, als bald zwirch mit eim abtrit wider umb zu seim lincken ohr, tief wind ohn seim schwerdt die kurtz schneid einwerts und wider auswerts zu seim lincken ohr, und haw dich von ihm. ¶
- ↑ An abbreviation sign at the end of the word tends to signify that it should be expanded to hawen, but it has been cancelled.
