Wiktenauer logo.png

Page:La noble science des ioueurs d'espee (Andre Paurenfeyndt) 1538.pdf/78

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

Rompure

Quant aulcun vous frappe court parmy: laisselle avaller et touchez en la croix devant vous que son train viengne entre vous deux mains lors luy boutez a tout le debout sur sa poictrine

Pieche

Si aulcun vous frappast apres les ployez des genoulx, tournez lestocq a tout la main droicte contre la terre, & a tout la main gauche tenez laultre debout de vostre visaige, & prenez le coup entre vous deux mains, & tournesle de dessoubz oultre son estocq devant ses deux mains, & levez en hault sur vostre senestre coste ainsi luy tirez le baston hors ses mains.

Pieche

Quant aulcun vous frappe apres le visaige de hault en bas a tout son baston, rechevez le long coup entre vous deux mains sur le vostre estocq, et tournez a tout le devant debout de vostre estocq de hault en bas sur le senestre coste oultre sa main, & tirez fort envez vous sur vostre senestre coste ainsi vous luy tirez le baston hors de ses mains.

Si aulcun a tout ung estocq frappast apres vostre main devant mise, rompez cela comme le dessusdict coup envers la teste se rompe.

Icy sensuyt lors la maniere de jouer a tout les courtz poingnarts.

La premiere pieche

Si aulcun vous boute par deseur apres le visaige ou apres la poictrine, entrez a tout vostre senestre braz, & prenez a tout la main senestre par dedens dehors outlre son dextre braz, & le pressez fort sur vostre coste senestre & puis boutez a tout le poingnart apres le visaige.