Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/84

From Wiktenauer
Revision as of 01:12, 6 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Kopff / vnd merck als bald er vmbschlecht / so fall jhm mit dem Schnit abermal auff die Arm / will er den auch nit leiden / sonder will sich ledig arbeiten / so volg jhm (auff seinen Armen bleibent) nach / vnd wann ers am wenigsten versihet / so laß abfliegen einer andern Blóß zů / vnd hauw dich von jhm ab.

Das drite stuck.

HAuwet er dir aber zů deiner Rechten / wann du also in die Oberhůt ankommen bist / so trit behende mit deinem Linkcen fuß gegen seiner Rechten auß seinem Hauw / vnd falle jhm zůgleich mit Langer schneide / Oben auff die sterck seines Schwerdts / vnd in dem du also auff sein Schwerdt fellest / so stoß dein knopff vnder deinem Rechten arm durch / also das du jhm mit geschrenckten henden die kurtze schneid wol úber oder neben seinem Schwerdt zům Kopff schlagest / fehret er aber mit seinem Schwerdt übersich gegen seiner Rechten / so laß die halb schneide neben derselbigen ablauffen / vnd trit vnder des wol gegen seiner Lincken / zůr seiten aus / vnnd hauwe mit Langer schneid gerad von Oben zů seinem Kopff / zůch aber behend wider úbersich / vnd schlage mit einer Zwirch von Vnden zů seinem Lincken ohr mit einem abtrit deines Lincken fus / als dann hauwe dich von jhm ab / rc.

Das vierde stuck.

MErck wañ du also im zůfechten mit deinem Schwerdt in die hóhe kommest / in die Hůt des Tags / vnd wirst aldo gewahr das er dir nicht so eilends zůhauwet / also das du dein stuck im Vor wol anfangen kanst / so verschrencke deine hend ob deinem Kopff / (die Recht vber die Linck) also das es scheinet als woltestu im zů seinem gesichte stechen / trit vnder des mit deinem Rechten fús zů jhm / vnd zůck dein Schwerdt gleich mit / gegen deiner Lincken vmb deinen Kopff / vnd hauwe jhm also von deiner Rechten mit kurtzer schneide durch ein Zwirch / krefftiglich zů seinem Lincken ohr / zůck behend wider ab zů ruck / vnd trauwe jhm mit langer Zwirch gegen seiner Rechten vndern Blóß / laß aber nicht rühren / sonder verzuck in dem selbigen flug dein schwerdt wider vbersich / vnd laß zům dritten die kurtze schneid dieff gegen seinem Lincken ohr ablauffen / vnd schlage jhm demnoch mit geschrenckten henden die kurtz schneid zů seinem Rechten ohr dieff hinein / als bald solches trifft / so trit mit dem Lincken fůß zů ruck vnnd