Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/83

From Wiktenauer
Jump to navigation Jump to search
This page needs to be proofread.

Das erst stuck.

VNd erstlich wann du fúr deinen Mann kommest / vnd aldo durch auffstreichen oder sonst mit auffziehen (zu einem Oberhauw) mit deinem Schwerdt in die hóhe kommen werest / vnd er hauwet dir in dessen gegen deiner Lincken zům Kopff / so spring wol auß seinem Hauw gegen seiner Lincken / etwas zů jhm vmb / vnd schlag mit außwendiger flech gegen seinem herfliegenden streich / das du sein Schwerdt in die sterck antreffest / vnnd das also starck / auff das sich dein vordertheil deiner klingen in solchem schlag / úber seinem Schwerdt zů seinem Kopff einschwinge / welche dann gewis triffst / wann du mit jhm zůgleich schlechst / vnnd doch mit deinem Schwerdt oberhalb des seinen kommest / auff solchen Hauw er hab getroffen oder nit / so zůck dein Schwerdt wider übersich ab / vnd hauwe übereck dargegen über / von Vnden zů seinem Rechten Arm / in solchem Hauw trit mit deinem Lincken fůß wol aus gegen seiner Rechten / vnd bucke dich mit deinem Kopff wol hinder dein Schwerdts klingen / von dannen zůcke behend wider übersich / vnd wincke jhm mit kurtzer schneide zů seinem Lincken ohr / ersihestu das er jhm nach wischet / so lasse nicht antreffen sonder fehl ablauffen / vnd verschrencke bald dein hend in der lufft (die Recht über die Lincke) vnd schlag jhm mit kurtzer schneide dieff zů seinem Rechten ohr / als bald Zwirch vmb vnd ziech ab / vnnd merck hie / wann er dir auff deinen obgelehrten Vnderhauw / so behend nach folgen / vnnd so hart auff dem tach sein wúrde / also das du zů dem ablauffen nicht kommen kanst / so hab acht in dem er von deinem Schwerdt abzuckt / so folge jhm mit dein Schnit nach auff die arm / rc.

Das ander stuck.

HAuwet er dir aber von Vnden gegen deiner Lincken / so trit abermal gegen seiner Lincken aus / vnd hauwe mit Langer schneide Oben auff die sterck seines Schwerdts / als bald dein Schwerdt auff das seine rúhrt oder glitzt / so zůck dein Schwerdt wider übersich in die hóh / vnd schlag mit kurtzer schneid in einem schnall wider nider / mit fernerm vmbtretten gegen seiner Lincken zů seinem Lincken ohr / dieff hinein / das wirt er in solcher eil versetzen wollen / vnd dargegen übersich fahren / darumb hauwe behend mit Langer schneid / widerumb zů seinem Rechten or / in solchem vmbschlagen trit wol gegen seiner Rechten wie vor / vnd bleib gleichwol mit dem kreutz hoch vber deinem