Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/133

From Wiktenauer
Jump to navigation Jump to search
This page needs to be proofread.

Zům Pflůg vnd Ochssen bist behendt /
Ihm trauw den Hauw bald wider endt.

Der Reimen ist an im selber auch gar deutlich / wie auch die andern / Nemlich das du zů dem Ochssen vnd Pflůg / das ist zůr vndern vnd obern Blóß / zů Linck vnd Recht / behendiglich kreutzweiß vnd vbereck Zwirchen solt / zů allen vier theilen / wie mit andern Hauwen / so in den vier Blóssen hievor weitleuffiger gelehrt.

Merck was fúr Zwürch mit springen wirdt gefúhrt /
Auch fehlest mit / nach wúntschen rúhrt.

Merck im zůfechten / wann du zůr Lincken obern Blóß zwirchen wilt / so spring zů solcher wol auff/ vnd laß auch den knopff wol vbersich gehen / so gehet die Zwirch tieff zům Kopff / sonderlich wann du die geberdt also verstellen kanst / auch gleich vnversehens mit der Zwirch daher gesprungen bist / das er des sprungs nicht gewahr nimpt biß er geschehen / vnd die Zwirch getroffen hat ersicht ers aber vnnd wehret oder versetzet solches / so trit eilents mit dem Lincken fůß gegen seiner Rechten seiten / vnnd Zwirche jhm von deiner Lincken / mit gesenktem Leib zů seiner Rechten vndern Blóß / die hast du (wo er die erste zwirch versetzt hat) gewiß.

Item wann du also dem Mann in einem sprung hoch vnd tieff zůschlechst / mit der zwirch oder sonst einer flech / vnd last es aber nicht treffen / sonder neben seiner Lincken fehl lauffen / schlechst also in eil mit der Zwirch einer andern Blóß / so triffestu nach wunsch / dann ehe er sich besinnet die Zwirch zůuersetzen / so hastu anderst wo getroffen / wo du anders solches mit gantzen Leib führest / das ist die geberdt zů solchem stuck recht brauchest.

Doppel solt du den Fehler machen /
Deß gleichen Trit vnd Schnit zwifachen.

Der Fehler ist ein gůt stuck gegen den Fechtern die gern versetzen / wie auch die vorige stuck auß der Zwirch / als wann du einer Blóß zůhauwest / vnd merckest das er dem Hauwe nach / versetzen / so laß du den Hauw fehl fúrüber