Page:Gründtliche Beschreibung der Kunst des Fechtens (Joachim Meÿer) 1570.pdf/120

Wann du ihm Hauwest Krump zur sterck,
Durchwendt, Uberlauff damit merck.

Wann du einem ein Krumphauw zuhauwest, und er hart widerhalt, also das du ihn mit uberschrencken oder anderer arbeit Oben nichts haben magst, so wend mit dem knopff unden durch, und greiff mit demselben im auff der andern seiten aussen uber sein klingen oder Arm, unnd reiss undersich, schlag ihn mit Langer schneid im riss auff sein Kopff, oder greiff mit dem knopff zwischen sein beide hend, wie in der Figur hievor getruckt an den zwen bossen gegen der Lincken hand zu sehen.

Bruch.

Hauwet einer ein Underhauw auff dich, so Hauw mit Langer schneid, das du dein hendt krum oder kreutzweiß habest, oben auff die sterck seiner klingen, in dem es dan glützt so schieb die kling gerichts für dir hin, unnd im fürtscheiben so winde die kurtze schneid in einem schnall umb zu seinem gesicht oder auff sein Kopff, fehret er auff und wehrt dir dein schnall, so fahr auch auff, unnd zuck umb dein Kopff, und schlag ihm zu seiner undern Blöß.

Des Knopffs verführens solt gedencken,
Mit Zeckrur, Schnellen würst ihn krenken.

Ist sovil, wenn du in einem Krumphauw einhauwest zu seiner Rechte, und er widerhelt oder versetzt hoch, so windt mit dem knopff unden durch, und stelle dich mit geberden als wolstu wie vor gelehrt, mit dem knopff ubergreiffen, ehe und denn er sich solches versicht, so Schnell ihm die kurtze schneide daselbst wider hinein, zu welcher seiten du erst den Krumphauw gethon hast.

Item greiff im zufechten dein gegenmann mit einem gewaltigen uberzwerch Mittelhauw, starck zum Lincken ohr an, zuck behend dein knopff umb dein Kopff, und trauw ihm damit, als ob du ihm mit dem Knopff zur andern seiten stossen wolß[!], und in dem er dir hie entgegen wischt den stoß zuversetzen, so schnell ihn mit der kurtzen schneid wider zu seinem Lincken ohr, und im schnall trit mit deinem Lincken fuß zu ruck hinder dein Rechten, und Hauwe dich von ihm.