Page:Gründtliche Beschreibung der Kunst des Fechtens (Joachim Meÿer) 1570.pdf/105

damit zwingestu jhn das er gehlingen vbersich fehrt / als bald er solch es thůt / so lasse dein Lincke hand vom knopff ab / vnd laß dein klingen gegen seiner Rechten von Vnden auff in einer hand vmb schnappen / vnd setze jhm den vordern ort an sein Brust / greiff in des dein knopff wider an / wie du solches an den kleinern Bilder zůr Rechten hand mit dem F. hievor sehen kanst / stoß jhn also mit verkehrter hand von dir / laß als bald dein knopff wider ab / vnd dein Schwerdt vmb dein Kopff fahren / vnd hauwe lang mit angreiffung des knopffs nach / dergleichen stuck soltu gegen die welche gern einlauffen gebrauchen.

Item vermerckestu das dein gegenfechter gern vnd bald hoch aufffehrt / so streich abermal gewaltig vor jm auf / vnd als bald du gewahr wirst das er vbersich fehrt / so hauwe jhm dieweil er noch im auffziehen ist / vberzwerch von deiner Rechten gegen seinem lincken Arm / so bald der antrifft / so bald schlage widerumb mit inwendiger flech zů seinem Rechten ohr / in einem schwung gar dieff.

Brechfenster.

ISt eigendtlich der Oberhůt zůgetheilt / welche wirt allein im bundt (nach dem du dem Mann vnder sein Schwerdt komen bist) gebraucht / von der lenge aber dieweil du des Manns orthe vnd klingen noch fúr dir sihest / solt du der hůt müssig gehen / dann du bist niergen sicher darinen / aber so bald du dem Mann vnder sein Schwerdt komen bist / so ist es der fúrnemsten Hůten eine / der brauch dich also.

Wann du nun vnder des Manns Schwerdt komen / also das du dein Schwerdt vber deinem Kopff in gemeltem Brechfenster führen must / damit du dann beide deine Arm vnnd finger Blos dargibst / derhalben so bald er von Oben dir zů den fingern hauwet / so trit wol aus seinem streich / einer seiten zů / gilt gleich zů welcher es sey / vnd hauwe mit einer Zwirch gegen seinem herfliegenden streich / also wirstu jhm nicht allein sein Hauw nach bey deinem Schilt auff die sterck deiner klingen aufffangen / sondern (wo er anders sein Hauw vnabgezuckt volführen will) triffest jhn auch mit dem eusseren theil deiner klingen zůgleich sein Kopff / Hauwet er dir aber zů deiner Armen einem / so hauwe abermals von derselbigen seiten gegen welchem Arm er dir hauwen will / mit einer Zwirch von Vnden / vbersich gegen seinem herfliegenden Hauw / vnd merck fleissig in dem er sein Schwerdt