Nº b
Hie hebt sich an die zettel darInn geschriben ist, die Ritterlich kunst des Vechtens. die hat gemacht Iohannes Lictenawer, der ein hocher maister in den künsten gewesen ist. Dem Gott gnedig sey. Des ersten mit dem langen schwert, Darnach mit dem spieß zu Roß. vnnd auch mit dem kurczen schwerdt, zu dem kampff. Als hernach gesschriben steet. vnd hebt sich also an ~
Iungkh Ritter lern
Gott lieb zehaben. frawen und Iungkfrawen Ehere,
so wechst dir lob und Ehere.
vbe Ritterschaft, und lere
Kunst die dich zieret,
vnnd Inn Kriegen zu Eern hofieret.
Ringes gutt sezzer
glefen. sper. schwert. vnd Messer
mandlich bederben,
vnnd in anderen hennden verderben,
haw drein und hurrt dar,
rausch hin, triff, oder laß farn,
Das in die weysen hassen,
die man sicht preisen,
darauff dich lasse.
alle kunst haben leng unnd masse,
Wiltdu kunst schauen,
sich lengken vnnd recht hauen,
vnnd linckh mit rechten,
ist das du starck gerest vechten.
Das ist die erst kunst des langen schwerts, da dir vor allen dingen die haw solt lernen. Glosa Recht hauen. ist das dir starckh gerst vechten. Vnnd das vernym also. Wann du mit dem lingken fuß vor stest vnd hauest. von der rechten seitten volgstu. dem haw nit nach, mit einem zutritt des rechten fuß. so ist der haw falsch. wann dein rechte seitten bleibt dahinder. darumb so wirdt der haw zu kurz und mag seinem rechten gang zu der anderen seitten vor dem linckhen fuß vnd sich nit gehaben.
oder stecstu mit dem rechten fuß vor. vnd hauest von der lingken seitten. vnd volgst dem haw nit nach so ist er aber ungerecht als vor. Darumben merckh wann du hauest von der rechten seitten. Das du allweg mit dem rechten fuß dem haw nach volgest. Deßgeleichen thue auch von der lingkhen seitten. so gibt sich der leib recht in die wag vnnd werden die haue recht gehauen. ~
Text
Wer nach geet hauen,
Der darff sich kunst wenig freuen.
Glosa Das ist, wenn du mit dem zu vechten zum man kumst. So soltu
