Daß ist eyn lere vnd ermanung der künst des schwertz dz du dar in gar woll gevbett vnd gericht solt sin dz du sie behendeglichen solt füren vnd mit behendikeit die pruchen gegen sinem stuecken recht triben Also dz du vff ydem bruch solt triben eyn die trihe wunder die dir hernoch vß gericht werden Auch soltu wissen die vier hengen der sint zweÿ vnten vnd zweyn oben dÿ obern dz ist der ochß die vntern dz ist der pflug zu beÿden siten vnd auß den verr hengen soltu pringen acht winden vnd die selbigen acht winden soltu also betrachten vnd recht wegen dz du vß yedem winden solt besunder triben eyn haulb eyn stich vnd eyn schnidt dz sint die vor geschreben vier winden ~
Item merck wie du auß den vier hengen solt triben acht winden dz erst vber hengen hatt zweÿ winden dz tribe also wan du mit dem zu vechten zu dem man kümpst so ste von diner rechten siten In den ochßen haut er dir dan oben zu diner lincken siten so wind gegen sinem haulb die kurtzen schniden an sinem schwert
