Was sich woll zwerett
Mit springen dem haulbt geferett
Merck du hast vor gehortt wie dz der ochsch vnd der pfug sin genant zweÿ leger oder zwie hutten so sin sie hie geheissen die vier ploß der ochß dz sint die ober zwei ploß die rechte vnd die lincke site an dem haupt So ist der pfug die vnter zwin ploß auch die recht vnd die lincke sitt nidert halbt der gurttell des mans vnd die plossen soltu mit den zwer schlegen In eynem zu vechten alle vier versuchen ~
alliud ~
Item Hie merck dÿ zwer schleg zu den vier plossen
Item wan du mit dem zu vechten zu ym kümpst stet er dan gegen dir yn der hut vom tag so spring mit dinem rechten fus gegen Im woll vff din rechte siten vnd schlag yn mit der zwer vsß gantzer kunst oben zu dem ochsen siner lincken siten versetz er dir den schlag so schlag ym bald vnten zu dem pfug siner rechten siten vnd tribe den furbas die zwer schleg behendeglich alwegen eynen zu dem ochßen den andern zu dem pfug krutzweiß von eyner siten zu der andern zu kopff ~
