Item das Ist das du mercken sollt, Wenn du mit ainnem zusamen Reitten willt, ob er dir woll zu der gerechten seitten zu reitten unnd dir den vortail angewinnen, so laß In darzu nit kumen sonnder wennd dich alweg mit deinner linncken seitten zu seinner Rechten, unnd wart das du nachent an In kompst, unnd wart seins rechten arms mit den ringen unnd stucken die da da vor unnd nach geschriben steen.
Item wer das sach das du getrunngen wurdest. Das du fliechen miest unnd reitt dir dann ainner hinnden zu deinner rechten seitten mit ainnem spieß oder schwert unnd woldt daran setzen, So wennd dich auß dem stich gogen Im auf dein linncken seitten, unnd wind mit deinnem schwert gogen seinnem spieß oder schwert, das dein Dawmen unnden kom und setz Im an ˙⁄.
Item Reitt Er dir zu der Linncken seitten, so Wennd dich auf dein rechten gogen Im unnd winnd mit den schwert als vor, und setz ~ Im an.
