Das annder Reyssen
Item stich Im Innwendig zům gesicht vnnd winnd aber mit dem knopff aůf dein Linncken seitten von vnden aůf vber sein klinngen zwischen zwischen seinner hannd Reÿß aber fast an dich stich Im zů seinnem gemecht wehrt er dir das vnnd fächt dir dz schert vnnd dů aůch das sein das baide schwert gefanngen seind so wirff dein schert mit dem knopff Im Inn sein rechte seitten vnnd spring mit deinem Rechten pain hinnder sein linnckes vnnd Nimb den růckh vnnd heb In ainnes zwern fingers hoch aůf von der erden vnnd schlag In mit deinnem rechten fůoß Aůßwenndig an sein rechten ennckel vnnd wirff zu aůf sein rechten seitten
Das dritt Reÿssen
Item thüo Im Gleÿch als ob geschrinben steet vnnd ob die paide schwert gefanngen weren so wirff Im aber dein knopff Inn sein rechten seitten vnnd sprinng mit dem rechten pain hinder sein linckes vnnd greiff Im mit deinner rechten hannd In beÿ seinem Arßbacken vnnd greiff mit deiner lincken hannd von vnnden aůf Im an sein kinpacken vnd zeůch vnden an dich vnnd stoß oben von dir so felt er ann den Růcken
