Das viert stückh
Item wann du Im Innwendig zum gesicht stichst vnnder dir wider so ganng eben aůf sein schwert vnnd begreiff sein schwert bey der klinngen Inn die hannd vnnd setz Inndes den ort an vnnder sein lincken Vchslen wehrt er dir das vnnd begreifft dir dein schwert aůch alls dů das seinn hast so arbait aůß ainnem Reÿssen alls hernach geschriben steet
Das erst Reÿssen
Item stich Im Innwendig zům gesicht wehrt er dir das vnnd setzt den stich ab so winnde mit deinem knopf von vnnden aůf dein linncken seitten vnd oben vber sein schwerts klingen zwischen seinnen baiden hennden vnnd reÿß fast an dich so reist dů Im sein linncken hannd von der klinngen vnnd stich Im denn zům gesicht Ist er dir zu starckh das dů Im die hannd vom schwert nit reÿssen magst so winde mit deinnem knopff aber von vnnden aůf dein rechte seiiten vber sein lincke hannd vnnd stoß In mit der klingen Inn sein linncken seitten hart von dir danne
