Zwen stoß Im halben spieß mit ainem schildt zunemen
Item schickh dich also mit disem stückh Wan Ir zusamen gond stannd mit deinem lincken fuoß vor unnd hallt deinen spieß mit baiden henden auf deiner rechten seitten Inndem volg mit deinem rechten schennckel hinnach unnd stich Im mit deinem vordern Ort zu seinem hals Sticht er dir also oben ein unnd du auch mit deinem lincken fuoß gögen Im steest unnd helst deinen spieß mit baiden hennden Inn der hoch neben deinem haupt so nimb Im das ab mit deinem vordern tail auf dein lincke seitten Inndem volg mit deinem rechten schennckel hinnach unnd stich Im zu seinem gemechten Sticht er dir also zu so versez Im das mit deinem spieß Inndem laß deinen Schildt unnd spieß fallen unnd trit mit deinem rechten schennckel zurückh ist er also zurückhtretten so laß deinen spieß und schildt auch fallen und greiff behennd nach seinem schildt faß In damit Inn baidhend hat er dir deinen schildt also genommen so zückh dein schwert unnd trit behend mit deinem rechten fuoß widerhinein und stich Im mit deinem Ort deines schwerts zu seinem Fisier versezt er dir dann das mit deinem schildt den Er dir genomen hat so verwechsel baidhend Inn dein klinge unnd schlag Im mit knopff und kreyz nach seinem haupt wind dich damit von Im zurückh
