Ain gmechtstich gögen ainem absezen mit dem schildt
Item wann Ir zusamen gond so schickh Dich also mit disem stückh stannd mit deinem lincken fuoß vor unnd halt deinen spieß mit baiden henden auf deiner rechten seiten Inndem stich Im mit deinem spieß nach seinen gemechten Sticht er dir also unnden zu unnd du mit deinem rechten fuoß gögen Im steest unnd helst dein schwert unnd schildt Inn deiner lincken hannd beyainannder den spieß In deiner rechten vor deinem angesicht den hindern Ort auff der erden so nimb seinen stich ginweckh mit deinem schuldt auf sein lincke seiten Inndem volg mit deinem lincken schennckel hinnach unnd stich Im mit deinem spieß nach seiner lincken Vchsen Sticht er also auf dich so trit mit deinem lincken schennckel zurückh unnd Nimb Im das ab mit deinem schildt Indes trit behennd mit obgemelltem fuoß wider hinein unnd wind Im deinen vordern Ort mit ainem stich zu seinem Fisier sezt er dir das ab mit seinem hindern Ort so wechsel durch an seinem spieß unnd stich Im deinen vordern Ort nach seinen gemechten unnd wind dich damit von Im zurückh
