Merain stuck im dolchen gogen dem duseggen.
Item mann ir zusamen gond So schickh dich allso Inn dises stuck stannd mit deinem rechten fuosz vor vnnd hallt dein Duseggen mit deiner rechten hand Inn der hoch ob deinem haupt stäter dann mit seinem rechten fuosz gögen dir vnnd hellt sein dolchen auszwenndig auf seinen rechten Arm Inn der versaszung so trit mit deinem lincken schennckel hinnein vnd greiff Im mit deinner lincken hannd nach seinem rechten Arm erwisch Im damit sein tolchen klingen vnd den arm zusamen Indes haw Im mit sterckh deinnes Duseggens zu seinem haupt hawt Er dir also oben zu so far Im mit deiner lincken hannd Innwendig In seinen rechten arm truck damit strack von dir auf dein rechte seiten Indes far mit deinem tolchen fur dein haupt so nimbstu Im seinen haw hinweck In dem trit mit deinem lincken schennckel hinnein vnd greiff Im mit deiner lincken hand nach seiner rechten scheub damit wol ober sich vnnd stich Im nach seinem gesicht oder der prust zeuch dich damit von Im zuruckh.
