Der dolch gogen dem duseggen
Item schickh dich also In Dises stuck mann ir zusamen gond stannd mit deinem rechten fuosz vor vnnd hallt deinnen Duseggen Inn ainem vnnderhaw gögen dem man Indes haw Im von vnnden nach seinem rechten Arm hawt Er dir also zu von vnnden vnnd du auch mit deinem rechten fuosz gögen Im steest so nimb Im seinen haw ab mit seinem dolchen auszwenndig auf deinem rechten Arm Indes greiff Im mit deinner lincken hannd auszwenndig Inn sein rechte vnnd mit deinem lincken fuosz trit hinder seinen rechten vnnd stich Im mit deinem dolchen nach seinem gesicht oder der prust sticht Er dir also zu so greiff Im mit deiner lincken hannd Inn sein rechte scheub damit von dir auf dein lincke seiten so nimbstu Im seinen stich hinweck Indes haw Im mit deinem Duseggen zu seinner nechsten plösz wa du In dann plösz sindst vnd trit damit von Im zuruckh.
