Ein oberer schlag Inn der Truschel
Item schickh dich also In Dises stuckh wann Ir zusamen gond. stannd mit deinem rechten fuosz vor vnnd hallt dein Truschel mit deiner rechten hannd mitten Inn deinner stanngen dein lincke bey deinem hindern Ort. Indes schlag Im mit deinem Fflegel nach seinem lincken furgesetzen schennckel. schlecht er dir also vnnden zu so zeuch deinen lincken fuosz zuruckh. Indes schlag Im mit deinem flegel nach seinem haupt oder Achsel seiner rechten seiten. das dir die Arm Creitzweisz vber ainannder. kumen Schlecht er dir also oben zu vnnd ist dir mit seinem linckhen fuosz auf deinen flegel treten. so fasz dein stanngen. mit deiner rechten hannd widerumb Indes trit mit deinnem rechten schennckel zuruckh vnnd reisz dein Truschel starckh an dich so entgeestu Im ausz dem schlag Indes trit behend mit deinem rechten fuosz wider hinnein vnnd schlag Im mit deinner stanngen. nach seinem lincken Arm zeuch dich damit von Im zuruckh.
