Ainn schlag zu dem haupt gogen ainem abnemen
Item wann Ir zusamen gond So hallt dich also mit disem stuckh stannd mit deinem rechten fuosz vor. vnnd hallt dein Truschel mit baiden henden. bey deinem vnndern Ort deinner stanngen Indes schlag Im mit deinem flegel nach seinem haupt seinner linckhen seiten Schlecht er dir also oben zu vnnd du mit deinem lincken fuosz gögen Im steest vnd helst dein Truschel mit deinner rechten hannd mitten Inn deinner stangen dein lincken bey deinem hindern Ort. vnnd wol Inn der wag steest. so trit mit deinem lincken schennckel zu.ruckh vnd nimb Im seinen schlag hinweckh mit deiner stanngen deiner Truschel auf dein lincken seiten. Inn dem trit behend mit deinem lincken schennckel wider hinnein vnnd schlag Im nach seiner rechten seiten seinnes haupts. Schlecht er dir also oben zu. so nimb Im das ab auf dein rechte seiten. Indes volg mit deinem lincken schennckel hinnach vnnd schlag Im nach seinem haupt seiner lincken seiten vnd trit damit von Im zuruckh
