Ainn oberer schnit gogen ainem gemecht schnit
Item wann Ir züsamen gond So schickh dich also Inn dises stuckh stannd mit deinem lincken fuosz vor vnnd hallt dein Seges mit deiner rechten hannd Inn deinem vnndern hefft auff deiner rechten seiten dein lincke Inn deinem mitlen gestrackt vor deinem leib gögen dem man. Indes schneid Im behend nach seinem hals seiner rechten. seiten Schneidt er dir also oben zu vnnd du mit deinem rechten fuosz gögen Im steest vnnd helst. dein Seges mit deiner lincken hannd Inn deinem vnndern hefft vor deinem gesicht dein rechte Inn deiner mitlen In ainem vndernschnit. so nimb Im seinen obern schnit mit deinerm gehültz deiner Seges hinweckh auf dein rechte seiten. Indes schneid Im zwischen baiden schenncklen nach seinen gemechten. schneidt er dir also vnndenzu. so far mit deiner Seges wol vnndersich vnnd truckh mit deinem gehultz sein seges hinweckh. so nimbstu Im seinen gemecht stich damit ab Indes gee wider auf mit deiner seges vnd schneid Im nach seinem hals seiner rechten seiten. schneid In damit zu der erden.
