Zwen mittel schnit
Item hallt dich also lit Disem stuckh. wann Ir zusamen gond. stannd mit deinem lincken fuosz vor. vnnd hallt dein Seges mit deiner rechten hand. Inn deinem vnndern hefft. dein rechte. In deinem mitlen auf deiner rechte seiten Inn dem volg mit deinem rechten schennckel hinnach. vnd schneid Im mit deiner Seges vmb seinen leib hinumb nach seiner rechten seiten Schneidt er also ainen mitlen schnidt auf dich vnd du auch mit deinnem linckhen fuosz gögen Im steest. vnnd helst dein Seges mit deiner rechten hand In deinem mitlen hefft dein lincke Inn deinem vndern auch auf deiner rechten seiten. so trit In triangel. auff. dein rechte seiten. vnnd versetz Im seinem mitlen schnit auszwendig In dein Seges In dem trit mit deinem rechten schennckel hinnein vnnd wind dein Seges hinder deinem haupt herfur. das dir die Arm Creitzweisz yber ainannder kumen. schneid Im damit nach seinem leib seinner rechten seiten. schneidt er dir auch also zu mit ainem mitlen schnit so far Im mit deiner Seges Inwendig In sein Seges scheubs damit starckh von dir auf dein rechte seiten In dem trit mit deinenm lincken schennckel auf sein rechte seiten vnd schneid Im nach seinem haupt. trit damit von Im zuruckh
