Zu beydenn seyttenn
ker dich an wider reytenn.
Item mergk das ist, das du dych yn allen an reyten nahen zu dem man solt halden, wan du dych zu ros mit eynem fohen wylt oder ryngen; ettliche hoffleyt treyben ir stuck an dem zu reyten zu dem man darinn, wan du an den man kumest, so pleyb bey im und las im zu keynnen dyngen noch stucken kumenn
Item mergk reytestu im zu seynner rechten seyten, so treyb dy stuck, dy zu der rechten seyten geheren; reytestu zu der lynckenn, so treyb dy stuck, dye zu der lyncken seyten geheren; und alle so mag er zu keynnen stucken kumen, wan es ist im zu kurz
Ob du wylt reyttenn
ros lauffs zu der ändern seiten,
dye sterck schut,
damit in not,
wer dir das weret
schwert fach trag nahen der hant
Zu der lincken seyttenn
Item merg das ist, wiltu eynen zu der lyncken seyten reytten, so soltu starck seyn mit der wer, es sey gleffen oder mit schwert; und wart, ob du magest dem man den ort an gesezen, do soltu in zwyngen gleych als zu der s rechten seyten hast gethan; do st zwyngest du in zu den stucken, dye man zu der lyncken seyten treyben sol; wen es seynt etliche stuck, dye man zu der lyncken seyten treybt, dye dye da zu der rechten seyten nyt mygen gehen
