Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/68

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

schehen / wiltu anderst etwas mit deinen stucken welcher du dich gebrauchest außrichten / den Trittestu zů frú oder zů spat / so ist es vmb dein stuck geschehen / vnnd bringest dich also selbst vmb deine Háuw / darumb so lerne du die Trit recht machen / damit deinem gegenfechter sein stuck nit wie er gern wolt / könne von stat bringen / sonder das du jhm das erdtrich oder platz gleich sam abstelest. Im angreiffen nun laß dich also mercken / vnnd stelle dich als woltestu grosse vn weite tritt thun / so du doch in der warheit mit den Fússen nahet bleibest / hergegen aber wañ er vermeinet du wollest gemach zů jhm tretten / so sey du geschwindt an jhm mit weiten tritten / vnd greiff ihn an / den es ist hier an sovil gelegen / das auch alle die so Fechten gelernt vnd dasselbig gebraucht / solches müssen bekennen.

Der Trit aber seind drey fúrneme vnderscheidt / Erstlich hindersich vnd fúrsich / was diese sein darff nit vil erklerens / wann nemlich einer zů oder vom Mann trit. Zům andern seind auch trit auff die seiten / welche werden durch den Triangel abgetheilt / memlich also. Stehe auff gerater Lini mit dem rechten Fůß vor dem gegenman / vnd trit mit dem Lincken hinder deim Rechten / gegen seiner Lincken / vnd diser ist der Einfach. Der ander so doppelt gemacht helt sich also / Trit wie vor mit dem rechten Fůß gegen seiner Lincken / folg denn mit dem Lincken hinder dem Rechten gegen seiner lincken etwas zůr seiten / vnnd dann zům dritten mit dem Rechten wider seiner Lincken zů. Zům dritte seind die gebrochne oder verstolene Tritt / die werden also volbracht / stell dich als woltestu mit dem einen Füß vortretten / ehe vnd den du in aber nider setzest / so trit wider mit im hindersich zůruck hinder den andern Fůß / Diese dieweil sie eigentlich in das Rappier gehóren / so will ichs daselbest hin sparen.