Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/434

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

Reissen.

MErck / als bald dir einer mit seinem Blat an das deinige hat angebunden / so mit deinem Blat an seiner Stangen ein wenig vber seines / also das du mit dem deinen vber das seinige hinein komest / vnd wend mit demselbigen vber sein Stangen / auff solches Reisse behend vnd starck vndersich zů dir / vnd ruck um also sein Wehr in die schwech / Stich also auff dasselbige behend an seiner Helleparten vbersich gegen seinem gesicht / fehrt er in eyl vbersich den stoß abzuwenden / so Wechsel behend (in dem er aufffehrt) vnden durch / vnd Stich jhm einem außtrit auff der andern seiten hinein / das gehet zů beiden seiten.

Wie du dich mit dem durchwechseln vnd Reissen / gegen dem der bald nachstóßt / halten solt.

SO du einem von deiner Lincken seiten angebunden hast / so Wechßle jhm mit vnachtsamen versaumlichen geberden durch / damit er dester ehe zů zůstechen angereitzt werde / als bald er nun (in deinem durchwechseln) hersticht / so wend mit deinem Blat vber sein Stangen / vnd Reisse abermals zů dir / gegen deiner Lincken / wie du zůvoren gegen deiner Rechten gerissen hast.

Item Stich auff einer seiten / doch mit fürsichtigkeit hinein / vnd merck fleissig ob er (in dem du hinein stichst) mit dir zůgleich hinein stechen wólle / so bald du das gewahr vnd innen wirst / als bald wende mit deinem Blat vber sein Stangen / vnd Reiß eben in dem er hersticht / mit deinem Blat vndersich zů dir / stoß behendiglich ehe dann er sich wieder erholt / gegen seinem gesicht / so wirstu jhm die Hellepart außreissen vnd treffen.

Oder Wann du also in deinem hinein stechen fúlest / das er mit dir zůgleich stechen will / so verhalt dein stoß fein heimlich vnd vhnmercksam / vnd trit hiemit wol beseits auß zů jhm / auch trucke jhm zůgleich sein Stangen eilents vnderisch von dir / schiebe also mit solchem vndersich trucken / dein Helleparten auff der seinen hinein / vber sein achsel hinauß / fasse ihn mit deinem Blat vmb den Halß / Reisse ihn mit demselbigen zů dir / wie du solches an den mittlern bossen in der Figur I. sehen kanst.

Weiter merck wann du einem mit deinem Blat angebunden hast / vnd er nicht arbeiten will / so gehe in eil vnd uhnversehens vom Blat ab / vnd trit ein wenig gegen der seiten / gegen welche du angebunden hast / auß / Stich