Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/432

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

du also außtrittest) sein herfliegende Helleparten mit deinem Blat auß / dan dieweil er sich mit dem eylents nachstossen sehr in die Schweche gibt / kanstu seine Helleparten leichtlich so vil außschlagen / vnd dermassen schwechen / das du jhm (ehe dann er sich wider erholt) sicher vnd wol zůr Blösse stechen kanst.

Ein anders auß disem Oberhauw.

MErck wann du also in der geraden Versatzung zů jhm komest / vnnd er nicht arbeiten will / so erhebe deine Helleparten abermals in eyl wie vor / vnd thů als woltestu im wider also außwendig zů seinem linken Arm hauwen / du solt aber denselbigen Hauw nicht antreffen lassen / sonder dieweil er mit seiner Helleparten / den Hauw zůversetzen nach abfehret / so fahr du vnder der seinen durch / vnd stich im auff der andern Seiten mit einem außtrit gegen derselbigen / zům Gesicht / in disem hinein stechen dieweil du dich etwas in die Schwech gibst / vnd blóssest / wirt er dir mit stechen behendiglichen zůeilen / desselbigé seines stossens nim in deinem hinein steché fleissig war / vnd fahre jhm dieweil er also herstosset / mit deinem Blat vber sein Stangen / Reisse also eben in dem er herstoßt / auff seiner Stangen her / mit deines Blats hocken zů dir / so ergreiffestu jhm damit seinen hocken / vnnd nimst jm seine Helleparten / als bald du jhm sein Helleparten etwas außgerissen hast / so stosse eilents wider gerad für dir hin / gegen seinem gesicht.

Regel.

ALs offt du nun also neben seiner Helleparten nach seinem Arm / oder der Hand zů / von oben nider durchhauwest / es geschehe solches ihn damit auff zůbringen / oder auß seinem vortheil abzůlocken / oder im sein Hand oder Arm damit zůletzen / So merck fleissig / in dem du mit deiner Hellepart vnder der seinen durch fellest / ob er dir nach stechen wólle / alßbald er solches thůt / so fahre behend mit vberzwerchem Blat wider vbersich / vnd schlage ihme also seinen herfliegenden Stoß von vnden vbersich auß / vnnd stoß jhm behendiglich ehe dann er sich wider erholt / gewaltiglich nach.

Auß dem Vnderhauw.

JM zůfechten schicke dich in die Lange gerade Versatzung / von dannen erhebe dein Hellepart vbersich in die Oberhůt / vnnd dieweil du also dein Helleparten vbersich hebest / dieselbige weil verkehr dein lincke Hand /