Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/375

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

Werffen.

ITem Sticht dir einer Oben zů / so stich jhm außwendig vber sein rechten Arm wie vor / ruck den zů dir / trit mit dem Lincken hinder sein Rechten / vnnd greyff mit der lincken hand hinden vmb an sein lincke Achsel / vnnd ruck jhn auff dein Lincke seyten / vber dein fúrgesetzt beyn / wie die mitlern obern bossen in obgedachter Figur anzeygen.

Wie du einem den Dolchen nemen solt.

Item zůcket einer ein Dolchen auff dich / so greiff im sein hand nicht mit verkehrter sonder mit geradem griff / hat er nun von Oben gestochen / vnd du hast jhm sein hand wie gesagt ergriffen / so reibe jhm die in einem schwung gegen deiner Rechten vndersich / vnd greiff mit Rechter verkehrter hand sein Dolchen kling / brich im die von der hand aus / Sticht er aber von vnden oder vornen gegen deinem gesicht / so begreyff im abermals sein hand wie vor / also das im angreyffen alwegen dein kleiner Finger gegen seyné Arm stehe / dein daumen gegen seiner hand / vnd begreiff jhm gleichfals wie vor / sein Dolchen mit Rechter verkehrter hand / vnd brich jhm den auß / wie dich das eusser kleiner Bild in der Figur C. zůr Lincken hand lehrt.

Item Sticht dir einer von Oben zů / so greiff mit deiner Lincken verkehrten hand sein Rechte treib den vbersich vmb von dir / vnd spring mit dem Rechten hinder seinen Rechten / vnnd fahr mit deinem Dolchen Knopff sampt offenner hand / vornen an sein gurgel / würff jhn von dir vber dein recht beyn.