Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/373

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

ubersich gegen seinem gesicht / vnd dieweil er demnach aufffehret das abzůweisen / so stich jhm inwendig von vberzwerch zům gesicht durch / demnach ficht dich mit kreutzstichen von im.

Merck wann dich einer vberlaufft mit einem oberstich / so versetze im mit deinem zwerch Dolchen / der dann langs auff deinem Arm ligen sol / vnd gleich mit in solcher versatzung soltu deine Lincke hand auff deiner Rechten kreutzweiß haben / vnd begreiff im also (in dem er her gestochen hat) sein Dolchen / mit Lincker verkehrter hand von vnden / brich jhm den gegen seiner Rechten achsel vbersich aus / in dem du also ausbrichst / so greiff mit deiner Rechten hand wol außwendig vber sein Rechten arm / auff das wo er den Dolchen nicht lassen wolt / du bald mit deinem Rechten hinder seinen Rechten trettest / vnd werffest in vber ruck von dir.

Merck im zůfechten vnderfahre im seinen oberstich mit kreutzigeten henden / also das die rechte hand in dem versetzen oben sey / vnd gleich mit in der versatzung ergreiff mit deiner lincken verkehrten hand sein Rechte starck an / vnd Stich im dieweil du sein Rechte ergriffen hast / von vnden auff vnder sein vchsen / oder starck vberzwerch zů seinen Rechten Ripen / zůck dein Dolchen behend wider vnder deinem Lincken arm gegen derselbigen seiten / Stich von dannen vbersich / starck gegen seinem rechten Arm durch / demnach Stich von deiner Rechten vberzwerch gegen seinem gesicht vnd Arm wegk.

Sticht dir einer außwendig gegen deiner Rechten zům Kopff / so Stich im außwendig vber seinen Rechten arm / kleme jhm den zwischen deinem glid vnd Dolchen / vnd Reiß den zů dir biß an dein rechte Brust / fall jhm mit der Lincken hand auff sein gelenck des Elenbogens / vnd brich im den Arm / wie in der Figur C. an den obern kleinern bossen zůr Rechten zů sehen.