Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/341

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

Ein geschwind stuck auß dem Pflůg / wie du zů beiden seiten durchwechseln / vnd inwendig zůr Brust stechen solt.

IM zůtretten so fúhre dein Gefeß auswendig neben deinem Rechten kni / auff solche weise wie du die Wehr zůvor inwendig dem Fůß gehalten hast / trit abermals mit vbersich gekehrter spitz zů jhm / Sticht oder hauwet er nun deinem gesicht oder der Brust zů / so wende dein Gefeß vbersich gegen deiner Lincken / also das du jhm seine herfliegende klinge mit deiner außwendigen fleche vbersich abwendest / wie du es zůvor von der andern seiten vbersich abgewisen hast / in dem du aber seinen stich oder hauw vbersich mit deiner fleche versetzet hast / so laß dein vorderen ohrt vnder seiner klingen gegen der anderen seiten durchgehn / Stich also ausserhalb seiner klingen gegen seiner Rechten vnd Stich jm eilents vnd behend von vberzwerch inwendig seinem Gefeß / wie vor gegen seiner Brust zů / Winde auch gleichfals wie vor mit deinem Gefeß wider vndersich gegen deiner Lincken / als denn kompstu wider in den lincken Pflůg. Dise beide stucke sollen mit behender geschicklichheit des leibes ins werck gericht vnd volbracht werden.

Ein ander stuck auß dem Absetzen.

SChicke dich jm zůfechten in erst gelehrten Pflůg / beut jhm das gesicht mit wol fúrsich gebucktem leibe trutzlichen dar / vnd merck in des fleissig als bald er her sticht / so wenden dein Gefeß vbersich gegen deiner Lincken seiden / vnd setze jhm hiemit seinen hergehenden stich mit außwendiger fleche gegen deiner Lincken krefftiglich ab / also das dein vorderer ort in solchem absetzen gegn seiner Lincken außstehent bleibe / als bald vnnd in dem die klingen nach also zůsamen Rúhren / so stich jhm mit wider herumb gewendem Gefeß / innerhalb dem seinen gegen seiner Brust / als bald der stich getroffen / so wende mit deinem Gefeß wider gegen deiner Lincken vndersich / damit wo er vnderdes wider hersteche / du jhm das abwendest / diseß stuck geht zů beiden seiten.