Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/296

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

sein stich wie gemeldet von dir Abschneidest / soltu mit gesencktem leib wol vber dein fúrsich gebogen Kni / dem Hauw nach zůlangen / Wann dan solches geschehen ist / so stehestu wider in der rechten Vnderhůt wie anfangs / wo er dir weiter zůstechen würt / so fahr eben auff vorgelegte weiß / mit Langer schneide wider vbersich / biß in die lincke Oberhůt / von dannen stich behendiglich mit einem außsprung gegen seiner Rechten lang für dir hin gegen seinem gesicht / in disem stich soltu abermals die Lange schneide so starck vndersich gegen deiner Rechten wenden / vnd in disem Abschneiden soltu dein klingen neben deiner Rechten zům streich verwenden / das du demnach einen geschwinden hauw / su einem Wehrstreich / schlims durch sein lincke achsel haben mógest / wann du den volbracht hast / so wirstu dein Wehr zůr Lincken in der Vnderhůt haben / von deren du als dann mit Langer scheide / wider vbersich biß in die Rechte Oberhůt versetzen magst / vnd fúrter.

Also bistu bißher gelehrt worden / wie du auß der rechten Oberhůt vnnd aus der lincken Vnderhůt / vndersich vnd vbersich gegen einander vberort / nach außweisung der schlimmen vnnd hangenden Lini versetzen solt / vnd als dann von der lincken Vnderhůt mit einem Wehrstreich / durch sein Rechte zůr andern seiten vmbwechseln solt / in die rechte Vnderhůt / demnach von der selbigen gleichsfals wie von der andern geschehen / vberort vbersich vnnd vndersich versetzen / vnnd nach deiner gelegenheit wider durch einen Zornhauw / oder Wehrstreich abermals vmbwechßlen / auff solche weiß kanstu alwegen aus einem Leger in das ander / vndersich vnnd vbersich mit Langer schneid / kreutzweiß vnd gegen einander Versetzen / Abschneiden vnd vbersich führen.

Weiter so kanstu auch aus allen vier seiten legern mit austretten / biß in das Lang ort Absetzen auff solchen art wie volgt.