Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/202

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

wehr / so fang jhm (zu dem das du jhm den vorigen Vnderhauw von Oben / dir vnschedlich abgewisen hast (auch seinen Oberhauw vbersich auff dein Lange schneid / vnd merck fleissig / in dem sein Hauw auff dein Versatzung bocht oder riert / sol gleichsfals wie dein Dusackenn gegen deiner lincken Achseln gezuckt werden / vnnd hauw jhm zur nechsten Blóß / oder in dem du jm sein Oberhauw auff dein Versatzung empfangen hast / so stich jm behend (ehe das er sich wider erholet) vnderhalb seinem Dusacken zu seinem Gesicht / das muß er wehren / vnnd dir damit raum geben zur obern Blóß.

Ein Exempel vnd stuck / wie du einen mit geberden / zu sampt den háuwen / auffbringen solt / damit du ihm desto besser mit krummer Schneide die Spindel letzen mógest.

Merck / wañ du im zůfechten bist / so nim fleissig war / ob sich gegen Fechter in den Bogen schické wólle / als bald du solches ersehé hast / so tritt vñ fúhre ein gewaltigen Oberhauw / auß der Hůt des Stiers mit ernsthafften geberden gegen seiner Lincken / laß aber solchen Hauw nicht antreffen noch rieren / sonder merck fleissig / als bald er vbersich auffehret den zůuersetzen / so verzucke deinen Hauw behendiglich gegen deiner Lincken wider ab vmb dein Kopff / vnnd in solchem abzucken vmbgreiff dein Handhab noch mehr / auff das wann du fürthin hauwen wilt / die krume schneid im treffen vorgang / vnd hauwe also (in dem er auffgefahren ist / dein hauw zu empfahen) von deiner Rechten vnderhalb seinem Dusacken / inwendig zu seinem Arm vbersich gegen deiner Lincken durch / wie du an disem Bild in gesetzter Figur zur Rechten / lernen vnd mercken kanst / du solt aber zu solchem Hauw nicht neher zu jhm kommen / dann das du jhm bloß seinen Arm zwischen seinem Elenbogen vnd seiner Hand mit dem eussersten deines Dusackens erlangé kanst / nach solchem Hauw laß dein Dusacké oben vmb dein Kopff verfahren / vnd hauwe jhm ein Mittelhauw sampt einem Oberhauw durch sein Gesicht / rc.