Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/179

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

darumb wann du tretten wilt / so erhole dich mit dem hinderen Fúß / damit du mit dem rechten fürtretten kónnest / dann du solt auff das wenigst / allwegen zu beiden Háuwen (so von beiden seitten durchs Kreutz gehauwen werden) ein tritt haben.

Disen Kreutzhauw sampt obgedachten vier Háuwen / soltu frey fligendt / gewaltig vnd behendt / mit außgestreckten Armen / hauwen lernen / vnd in den Háuwen di Arm nicht also in Búsen (wie man sagt) das ist / kurtz bey dir fúren / dann der der also kurtz fichtet / vnd die Arm nahe bey jhm fúhret / ist leichtlich zúuerfúhren / vnd zu rieren / wiewol das außstrecken auch sein maß vnd ziel / nach gelegenheit der zeit haben muß. Derhalben will ich dich in sonderheit ermanet haben / so du dir anderst diß Búch nutz machen wilt / du wóllest vor alllen dingen die Háuw frey lang vnd wol lernen hauwen / vnnd so du die Principal Háuw wol kanst / so werden dir als dann die andern alle leicht werden. Dann du fechtest was für stud du immer wóllest / wie gút sie auch seindt / wañ du die Háuw an jhn selber / ein jeden nach seiner arth / in sonderheit nicht wol kanst / vnd die stuck recht fúhrest / so wirst du nicht vil nútzliches außrichten / dann alles Fechten / wie offt gesagt / stehet auff den Háuwen.

Zúm letsten / merck wie die Háw einander breché / kúrtzlich dise Regel / nemlich / Zúm ersté so bricht der Oberhauw (so du den gegen des Manns Dusácké zu der stárck gegé seiner rechten Hand fúrest) all and Háuw / die auff dich gehauwen werden / es sey von Vnden / schlims oder vberzwerch / hergegen / so bricht oder nimpt der Zornhauw / oder der vberzwerch Mittelhauwe / den Oberhauw / demnach / so merck auch / das alwegen zwen gleiche Háuw / die gegen einander mit jhren tritten gehauwen werden / einander abtragen vnd versetzen / doch richt der mit seim hauwen am meisten auß / der mit seim Wehr im hauwen oberhalb des an dern kompt / derhalben so offt dir einer von Vnden vberzwerch zúhauwet / es sey von Lincker oder Rechter / dem begegne mit