Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/146

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

WAnn jhr also nahet zůsamen komen / so trit jhm mit deinem Lincken fůß zwischen seine beide bein / laß hiemit dein Lincke hand vom Schwerdt / vnnd wende jhm ein wenig den rucken / greiff vnder deß mit deiner / vom Schwerdt abgelassener Lincker hand / vnder seinen beiden Armen durch / vnd aussen vber seinen Lincken arm / mit der Rechten hand aber / sampt dem Schwerdt (oder wirff dasselbige von dir) greiffe aussen vber seinen Rechten arm / also das du mit deiner Rechten hand dein Lincke oberhalb seinen beiden Armen wider ergreiffest / trucke jhm alle beyde Arm zůsamen / auff dein Lincke achsel / hie zwischen trit auch mit dem Lincken fůß vornen fúr seine beide fůß / schwinge dich hiemit auff dein Rechte seyten / vnd in dem schwung bucke dich fúrsich vndersich / vnd wirff in fur dir nider.

Ein anders.

ODer in dem jhr durch einlauffen so nahet zůsamen komen seind / also das es zů rung gerahten muß / so trit mit dem Rechten fůß zwischen sein beide bein / laß die Lincke hand vom Schwerdt / vnnd greyffe mit den Rechten hand sampt dem Schwerdt vnder seinen rechten Arm durch / aussen vmb seinen leib / vnd mit der Lincken hand ergreyffe jhm von inwendig durch / seinen rechten Schenckel / jhe niderer jhe besser / vnd schauwe das du mit deinem Rechten fůß zwischen sein beyde bein wol durchgetretten seyest / auff das du mit demselbigen mit widersperren vnnd außrucken / dem wurff zů hilff komen könnest / erhebe jhn also in einem schwung / vnnd wirff jhn hinder dir auff seinen Kopff.

Ein anders.

VNderlaufft dir einer mit der Zwirch dein Schwerdt / so merck in dem er dir gegen deiner Lincken herzwircht / so versetze jhm solche Zwirch mit hangender klingen / vnd greiff mit der Lincken hand (die du dann vom Schwerdt ablassen solt) vnder deiner vnnd seiner klingen durch / außwendig vber seinen rechten Arm / fall jhm also mit derselben verkehrten Lincken hand an die gurgel / auch trit vnder des mit dem lincken fůß hinder seinen Rechten / wirff jhn abermals an seinen rucken.

Damit du aber den Ringen vnd Greiffen ein grund habest / so will ich dir die Hengen vnd Winden erlicher massen dar thun vnnd erkleren / auß welchen dann die Kampffstuck im kurtzen Schwerdt herfliessen vnnd erwachssen / vnd werden die Hengen zů zweyerley fúrnemen ins werck gericht / gebraucht / Nemlich zům ersten werden sie gebraucht