Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/134

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

lauffen / vnd schlechst einer andern Blóß zů / Doppel fehlen ist ein kunstreich stuck / vnnd gehöret ein geúbter Fechter darzů / aber ich will dir etliche stuck doppel vnnd einfach hieher setzen vnd beschreiben / darauß du allerley fehler wol lernen kanst.

Im zůfechten schick dich in die Zornhůt zůr Rechten / als bald er sein Schwerdt in die lufft bringt / so hauwe von deiner Rechten vmb dein Kopff / mit Langer schneid vnd außgestreckten Armen / zů seiner Rechten seiten fehl durch / also das die Zwirch gewaltig in der lufft wider vmbfleugt gegen seinem Lincken ohr / laß aber nit rühren / sonder zůck wider vmb den Kopff / vnd hauwe mit Langer schneide das sich die flech dapffer einschwing zů seinem Rechten ohr / jetz verkehr / schnap vmb laß verfliegen / vnd was dir fúr arbeit werden mag.

Item im zůfechten hauw ein langen Oberhauw / zů seiner Lincken obern Blóß / wann du mit dem Hauw oben in der Lufft schier an sein klingen rührest / so verwandle den Oberhauw in ein Zwirch / vnd schlag ihn mit der zwirch von Vnden zů dem Lincken ohr / oder Armen / Dises seind die rechten Fechtstuck / darauß vil feiner stuck gefochten werden.

Ein Fehler mit dem falschen Trit.

IM zůfechten hauwe einen hohen Oberhauw / vnd wann dein kling schier an sein Klinge rúhret /als bald verwandle den Oberhauw in ein Zwirch / vnd gleich mit der Zwirch trit mit deinem Rechten fůß zwischen dir vnd jhm beiseits durch / auff sein Rechte seiten / vnd hauw jhn vnder des durch solche Zwirch den ort zwischen seinen Armen zům Maul / wie du solches an den kleinern obern Bilder in hie nach getruckter Figur sehen kanst / als bald laß wider vmb schnappen / vnd schlag ihn mit kurtzer schneide vnd gekreutzigten Henden wider vmb zů seinem Rechten ohr / oder hauwe mit Langer schneide nach / doch spring mit solchem streich wol auff sein Rechte / beiseits auß.

Zwifach oder doppel fehlen.

ITem im zůfechté ehe du recht zů jhm kompst / so hauwe neben deiner Rechten durch / das dein Wehr vberschiesse im sturtz / trit fúrbaß mit dem rechten Fůß zů jhm / laß dein Schwerdt vmb den Kopff fahren / vnd zůck ein