Wenn er dir einlaufft, laß dein messer fallen, und verker deine rechte handt, und greiff damit sein rechte, außwendigs, reib die handt undersich umb, und mit deiner lincken handt faß ihn beim rechten elpogen, und spring mit dem lincken fuß für, und heb seine rechte handt uff, und stoß die über deinen lincken arm, und heb ihn damit über sich auff, Ist er dir zustarck, so greiff mitt deiner rechten hand oben auff seine rechte achsel, und gewinn ihm die wage an, so magstu mit ihm thun was du wilt.
¶ Ein ander Beschließen.
Greiff ihm über seinen rechten arm, mit deinr lincken hand, In dem far mit deim messer under seinen rechten arm, und fall mit deinr lincken hand in die mitte der klingen, far ihm damit in sein elnpogen hinden, truck mit stercke nider, und trit genaw an ihn, heb mit deiner rechten handt übersich mitt dem messer, so ist er gefaßt.
Das benemen.
Ligt er im hangenden ort,
Benim das messer on forcht,
Mit dem kurtz soltu schieben,
Mit beden schneiden dich üben.
Im zufechten, so ihr bede im hangenden ort, ligstu an seiner lincken seitenn, an seinem messer, so far mit der kurtzen oder gehültz an sein rechte seitten, und schlahe ihm mitt der langen zum kopff.
Ligt er dir also an deiner rechten seiten, unnd du ihme gegenn der seinen angebunden, so far mit dem creutz oder gehültz an sein lincke seitt am messer, scheubs zur rechten, In des schreit wol zu seiner lincken mit dem fuß, Schlahe ihn mit der kurtzen.
