vmb drät Dar vmb ist es pesser vermiten wenn es hat vil pruch ~
Item das ander ringen Ist der rigel für schiessen fur einen oder paide pain vnd von paiden seitten ist es albeg gu°t vnd gewis Also siech welches pain er vor gesetzt hat das selb setz Im auch für fur einen rigel Ist das er setzt für das recht pain so nah im nach vnd setz dein rechts pain Im zwischen sein paide das dein rechte scheib wol stee an seiner rechten scheiben ~
Doch vor allen sachen so müstu vor begreiffen sein rechte hant in der wag Im gelenck mit deiner lincken vnd dein rechte hant auswendig in der püg zu° dir mit deiner rechten hant oder mit deine~ rechten arm~ von vnden auf dein hant seÿ vnd dein arm~ oben seÿ so zeuch oben den arm~ zu° dir vnd dauch mit deine~ rigel vnden von dir vnd würf In auf dein rechte seitten auf das maul oder arm~ prich
Item das dritt ringen ist das vor pain kunstigklich schliessen Also merck auf sein pain das dir am nagstenn ist wenn du in der arbait in wild werfen vnd mit vortail dar zu° ku~men magst So far mit deinen paiden offen painen vmb sein pain das da vor stet vmb sein knÿscheib mit deinen paiden scheÿben vnd druck dein paidew knÿe zu° sam~en fast Also das sein scheÿb seins pains nicht von dir chöme
