wiltu pleiben vnd arbaitten mit der langen were oder mit dem sper nach dem stich vnd nicht wil vor schiessen das sper So pis rasch vnd spring vnd stich mit künsten vnd als pald du hast an gesetzt in sein gesicht oder vnder sein vchsen oder in sein hantschuech Inwendig oder wo du ein plöss hast gefunden so wind dein sper vnder dein vchsen vnd druck für sich ob du Im magst die seittñ an gewinnen sich magstu In stechen durch sein fuess welicher das seÿ oder durch sein fuß zuck dein sper nicht vntz das er sich ergeb vnd su°ch kain ander vortail du magst in deñ habñ gar gewis an allen zweifel Wert er aber dem ansetzen deins ortz wo die ansatzu~g sey als vorgeschriben ist So zuck dein sper vnd setz ÿm wider an wo du magst an die oder an der plöss mit kunst vnd arbait mit dem ort oder sich auf die ringen als hernach geschriben stet vnd wenn er sticht so spring auf ein seittñ aus dem sper ~
Das Ist der text
Wiltu vor stechen
mit zucken ler wer prechen
Glosa merck das ist Ist das du stichst felst vnd in nicht hast getroffen das Im schädlich seÿ vnd frum dir pringen mag So zuck dein sper vnd stich wider vnd wart In auf sein leip mit
