Merck krumpt er mit der lincken seitten an dein rechte vnd vert dir mit dem lincken arm~ hinden vmb den hals oder helt dich do mit peÿ deiner lincken achsel So wendt dich mit dem leib gegen Im vnd var mit dem rechten arm~ Inwendig auf zwischen dir vnd Im vnd druck den lincken arm~ ab mit der sterck deines rechtñ arm~s so wirstu von Im ledig
Aber ein pruch
·M·erck wenn er chumpt mit seiner lincken seitten an dein rechte vnd velt dir mit dem lincken arm~ hinden vmb den hals Ist er denn ein swacher man So var mit dem rechten arm~ hinder dich von vnden auf starck vber sein linken vnd kum mit der lincken hant deiner rechten zw hilff vnd druck Im sein lincken arm~ vast hindñ in deinen nacken Weicht er denn mit dem arm~ ab So begreiff mit der lincken hant sein lincke vnd würff im mit dem vngenantem griff oder mit dem verporgen grieff
Aber ein pruch
Merck chumpt er dir mit seiner lincken seittñ an dein rechte vnd velt dir mit dem linckñ arm~ hinden vmb den leip vnd wil ringen So slach hinder dich von oben nyder mit der rechten hant In aus wendig Indas gelenck seins lincken arm~s vnd reitt fur dich
Das lert die xxvj figur die spricht also vber greiff wer dich an vellt oder
