Einn verkerer mit ainnem Dopelten oberhau
Item: wann du mit dem zufechten zu dem ajann kompst, so schich dich also, stannd mit deinnem lincken fuoss vor und haw Im zwifach oben ein, Indem alsbald du seines duseggen empfindest, so volg mit deinem rechten schenckel hinnach und greiff mit deinner lincken hannd nach seiner rechten achsen und scheub Im damit von dir, so verkerstu In, verkert Er dich also vom Im unnd du mit deinnem rechten fuoss vor steest Inn dem verkerer, so zeuch deinnen lincken fuoss zuruck und stich Im zwifach nach seinnem gesicht oder der prust, versezt Er dir das, so volg mit deinnem rechten fuoss wider hinnein und haw Im nach seinem haupt, wirt er des haws gewar und versezt dir den furbas, so gang auf mit deinnem Duseggen fur dein haupt das der Ort auf der lincken seitten hanng und greiff mit deinner lincken hand nach deinnem Ort und schlag In mit dem gehulz nach seinnem haupt, hawt Er dir dann also mit seinnem hefft auf dich, so verscheub Im das mit der Kron, Indes lass behend ablauffen unnd haw Im mit der zwirch zu seinnem haupt, versezt er dir das, so haw von ainner plosse zu der andern unnden und oben wa du In ploss findest.
