Das ist fassendyngersch ryngen, das magstu treyben zu allen seyttenn, wo du an den man komest
X Item das treyb also: Komstu mit der rechten seytten an seyn rechte, wan ir zu samen reytent, so halt dych fast an inne und greyff mit der lynckenn hant hynten um in und begreyff in domit seynem lyncken arm und zeych in vast herum zu dyr, und mit deynner rechten hant greyff im undenn an seyn kynbagken und stos in dan vast von dyr uber sych auff seyn lyncke seyten, so kerestu im seyn antliz auff gegen der sonnen, damit gewynstu im den schwanck, an das er sych nyt mag gehalten, wyrff in vor dych von dem ros
fygura
Item darum sprycht dye 15 fygura in der nehe fach dye hant, vorker seyn antliz, do der nackt ist
Item das ryngen heysset das sunzeygen, darum das es yeder man nycht versten sol, wan es ist verporgen
Item komstu mit der lyncken an seyn rechte, so begreyff als vor und wyrff in hynter dych auff seyn lyncke seyten
Bruch dorwyder
X Merg hye leret er, wye man das sunen zeygen prechen sol und der pruch ist mer, wan eyner und seyn auff schwach und auff starcke leyte
Item kompt eynner mit seyner rechten seyten an deyn rechte und ist stargk und wyl dych werffen mit den sunen zeygen, und wan er dyr greyffet mit der rechten hant an den kynpacken, so schlagk deyn rechten arm uben uber seyn rechten, und truck in vast an deyn prust und leg dych mit dem leyb dorauff und reyt vor dych, so wyrffstu in
