Item welt er seyn schwert zeihen, so far im mith deynnem rechten arm durch seynnen rechten und druck in fast zu dyr und went deyn ros von im, so velt er etc
Item hat er dan seyn schwert gezogen und wyl schlahen, so nym den schaff gryff, und wen du im den schaff gryff thust, so prych im seyn rechten arm uber deynen rechten arm mith deynner linncken hant
Item wen du begryffen hast seyn rechte mit deynner lincken, so druck sy vor deyn prust und went deyn ros von im umb, so felt er
figura
Item darumb sprycht dye ander fygura umb ker deyn ros, zeych seyn rechte hant mith deynner lincken
Item wen du seyn hant begryffen hast wye vor, so lege dych mit der prust auff seyn arm und reyt, so mus er hyn wegk
Item ferth er hoch auff mit dem arm, er hab eyn schwerth aber nycht, so greyff mit der rechten hanth seynen elbogen; und mit deynnem rechten fus erheb seynen rechten fus, so mus er fallen
Item hath er eyn schwerth, so greyff im mit der lincken hant seyn schw rechten elbogen und mit der rechten hant seynes schwerth knopff; und stos mit deyner lyncken und zeich mit der rechten das schwert zu dyr, so nimstu in das schwert
figura
Item darumb spricht dye eylffte fygura druck fast, stos vom zaum und fach seyn messer
