Wiktenauer logo.png

Page:MS 26-232 121v.png

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

vnd begreiff damit den satelbogenn vnd reitt fur dich so muß er vallen vnd wiß das dw mit dem Ringen prichst alle ringenn da mit man dich vorn an velt darumb Spricht die 13 figur

der schoff griff wert alle griff ringens vnter augenn

Item auch magstu In treibenn wen dw zw seiner linken seyten Reytest wen Er sich will weren mit der linken hand

Wer dich ann velt
widerreyttens der wird geuellet
hanges gegenn der erdenn
vber greiff in recht mit gewerdenn

Das Ist ein schlecht ringenn Reit dir eyner zw der R seiten vnd vert dir mit dem R arm vmb den hals far Im auch also vmb den seinen vnd halt In vast hinten bey der Joppenn oder was er an hat vnd henck dich nyder auff die linken seytten als dw von dem Roß wollest vallenn vnd zeuch In also nach dir von dem Roß hastu dich zw ser nider gehanngenn das dich dunckt dw must auch vallenn So halt In fast so zeucht er dich wider einhin In den satel mit seinem vall

Zw paidenn Seytenn
ker dich an In ain wider reittenn

Merck das Ist das das [!] dw dich allenn anreyten nohend zw dem man solt machen wen dw dich In allenn anreyten zw Roß mit einem vahenn wild oder ringenn Erlich hoffleüt treiben die Stuck an dem zw Reytenn zw dem man darumb wen dw zw dem man kumst / So pleib bey Im vnd las In zw keinem Stuckenn komen

Item Merck reittestu Im zw Rechten seytenn so treib die Stuck die zw der R seytten gehorenn Reytestu dw zw der linken seyttenn so treib die Stuck die zw der linken seytten gehorenn vnd also mag er zw keinen stucken komenn wan es Ist Im zw kurtz

Das Ist ob dw wilt Reytenn
Roßlauffs zw der anndern seyttenn
Die sterck schut
damit In not /
wer dir das wert
Schwert vach trag nahen der hand