den ortt zwischenn dein beid hend vnd setz Im den ortt zw dem gesicht vnd setz Im an
Item auch magstu Im mit dem halben absetzenn was auff dich gestochenn wirt es sey mit der glefen oder schwert auch zw hilff komen wen es dir nott Ist als die sests figur lernet
Zwen strich ler
mit lerer hand gegen der wer
Das Ist die aller best kunst als sye In dem Roß vechten Ist oder sein mag vnd Ist verborgenn vnd gett zw mit der linkenn hand vnd darumb soltu wissenn das zawm an Zw Richtenn das dw die linck hand mügst frey gehabenn wen dw wild vnd dennoch deins Roß mügst mechtig sein mit dem zawm vnd das Ist gearbeitt mit lediger hand
Item wann mit der Rechten hand müstü die glefenn oder das schwert haltenn darumb lert die zwelfft figur mit lerer hand lern zwen strich gegenn allen weren
Item was kunst dw mit lediger handt solt treibenn gegen der glefenn oder gegen dem Schwert oder mit Ringenn das vinstu In den glosen alles geschribenn
Der schaff griff wertt
wer sich Ringes zw dir kertt
Als vnter augenn
Greiff In an recht mit flaugenn
Merck das ist der rechtenn vnd pestenn Ringenn ains als es zw Roß gesein mag Darumb heist es der schoff griff das es nit yederman versten mag
Item ader In den glossen heist es der schaff griff wan der schoff griff ist der R arm deines wider sachenn So soltu albeg nach greiffenn wen dw zw Roß ringest wen er mit der linken hand helt den zawm die Ist dir nit also schedlich
Item wen dw solt wissen das das Ringen gleich vorn zw dem man zw gett vnter augen zw seiner Rechten handt
Item wiltu ringen so reitt dem mann zw seiner R seiten vnd greiff In an mit ringen greifft er dich wider an so greiff mit deiner linken hand seinen Rechten arm hinter seiner hand vnd zeuch den arm fur dich vnd far mit dem .R. arm vber den vnd truck da mit nyder
