vnnd lasse den vierten treffen / eben desgleichen trauwe den ersten vnnd den andern biß an die Blósse / vnd verzucke doch solches wider ab / vnd führe den der andern nechsten Blósse eine zů / in dieser verzuckung kanstu / vnd solt sie auch mit dem ersten angreiffen / aller ding wie hievor in der ziffer gelehrt abwechseln / nemlich das du jetz an dieser dann an einer andern abzuckest vnnd verfehlen lassest / vnd vnder des gleichwol fúrsorg vnd auffmerckens habest / wo er dir jrgendt zůr Blóß würde einfallen / das du jm bald von solchem verzucken mit dem Bandt an seinem schwerdt seyest / aus disem verzucken fleußt nun weiter das Ablauffen vnd Fehlen vnnd dergleichen / Also wann du ein hauw dieser obgedachten theilen des Mans eine zůführest / vnd aber in dem du gewahr würst / das er solchen Hauw versetzen / so zůckest du gleichwol nicht wider ab / sonder (auf das er deines vermerckens nicht gewahr werde) so lasse neben der selben seiten vollen fehl fúruber ablauffen / vnnd Hauwe jhm behende zů einer andern Blóß / ehe dann ers recht (was du fúhrest) innen wirt / Exempel:
So du dich durch das auffstreychen zům streich erholet hast / wie Oben gelehret / so trit vnnd hauwe von deiner Rechten hoch herein gegen seinem Lincken ohr / als bald er dem nach wischt so lasse behend dein klingen mit der halben schneide neben seiner Lincken vndersich sincken / vnnd ruck damit dein Knopff vnd Hefft vbersich / vnd hauwe jhm behend mit kurtzer schneide zů seinem Rechten ohr / also das dein hend in solchem hauw kreutzweiß kommen.
Item las den ersten gegen seinem Lincken ohr hart antreffen / den andern lasse behend auff vorige weiß neben seinem Rechten fehl furuber lauffen / vnnd triffe dieff zů seinem Lincken ohr / also magstu auch ( wo du den ersten mit jm hart eingehauwen hast ) behend darauff / auff beiden seiten ablauffen lassen / vnd demnoch zů der nechsten Blóß so die offen ist einfallen / dises alles so bisher gelehrt kanstu vberecke vnd kreutzweiß / auch gegeneinander einfach vnnd doppel / in das
