Wie du deinen Spieß mit einer hand erschwingen / und hinein stossen solt.
JM zůfechten schicke dich mit deinem Spieß nach außweisung des obern kleinern Bildes / zůr Lincken Hand in der Figur L. fúr den man / als bald er demnach herstost / so erschwing deinen Spieß von deiner Rechten gegen deiner Lincken / vor deinem gesicht herumb / wie du solches an obgedachtes Bildes geberden mercken kanst / also das du jm in disem schwang mit dem hindern theil deines Spieses den seinen ausschlagest / oder im austretten aus seinem entweichest / in dessen tritt zůgleich auch mit deinem Lincken hinder deinem Rechten zů jhm / also das du im den rucken zůkehrest / vnd stoß also noch in krafft vnnd gewicht des ersten schwungs / neben deiner Rechten zůruck vbersich gegen seinem gesicht / zů solchen stoß trit auch mit dem Rechten fůß hindersich zů im / als bald der stoß volbracht / vnd in dem dein Spieß noch vornen auff die erden falt / so bleib mit dem Rechten Fůß stan / mit dem Lincken aber trit ein weiter schrit von jhm / vnd sencke den obern leib wol vom man / fúrsich vber dein Linck kni / welches dann wo fúrsich gebogen sein soll / vnd zieh hiemit den hindern ort mit der Rechten hand zů dir.biß hart neben dein Lincken fůß / auff die erden / vnnd wart alda auff sein herstossen / so bald er demnach herstost / so schwinge deinenSpies gewaltig / abermal mit einer hand von deiner Lincken vbersich gegen deiner Rechten / zů solchem schwung trit mit deinem Lincken Fůß gleich in einem sprung / wol aus gegen seiner Rechten / stoß also mit deiner hand (dieweil dein Spieß noch also in der lufft durch krafft des schwungs fleugt) von Oben gegen seinem gesicht vnd merck das du in disem allem / deinen Spieß bey dem hindern ort also gefast solt haben / das im halten des Spieses / der kleine finger mit dem halben handschlag der Stangen werts hinein / vnd der daumen sampt dem zeiger / vornen am ort heraus stehe.
Ein anderer stoß mit einer hand.
LEgere dich auf solche form fúr den man / wie dir solches an dem obern Bilde / in der Figur B. zůr Rechté hand fúrgestelt / vnd anzeigt ist / vnd schiebe dein Spieß in eim ruck / also mit einer hand von dir / vnd ruck den eilents mit dem hindern ort gegen deriner Lincken vbersich wider zů dir / auff das er sich eben in solchem rucken vornen vbersich heb vnd erschwing / in disem vbersich schwingen trit wol auff dein Rechte seiten gegen jhm / vnd stoß abermals mit einer hand gegen im.
