Nachreisen.
WAnn einer vor dir in der vnderhuten eine steht / vnd wil als dann vbersich gehn in die Oberhůt / so nim war in dem er noch im auffschwingen ist / so stoß jhm nach / so triffestu ihn auff solche weiß / wie dir das in der Figur / A. an den obern bossen fúrgemahlet ist / Dises nachstossen soltu in allen banden wahrnemen / das du so bald er abgehet / vnd noch im abgehn ist / nachstossest.
Regel.
VOm verstossen merck dise Regel aslo / wann du dich mit einem begirigen stoß / auff was weiß das geschehen sey / verstossen hast / so spring mit dem vordern Fůß zů ruck / vnd zůcke das hinder ort vbersich / wie du solches an dem obern Bilde zůr Rechten hand / in hievor getruckter Figur H. sehen kanst / thrage jhm also alle seine nachstóß ab / vnd greiffe vnder des mit der Lincken hand wider in dein Stangen / erschwing dieselbige wider in dein krafft vnd volmacht / biß in die Huten (so dir gelegen) eine / wie dir dann solches die úbung weiter offenbahrn wirdt.
Ein ander gut stuck damit du ihn aus seinem vortheil abreitzen kanst.
FIehre deinen Spieß in der Vnderhůt auff deinem fúrgesetzten schenckel / vnnd gibe demselbigen durch bwegliche gewicht einen schwang / in dem sich nun also das vorder theil deines Spieses vbersich schwinget / so stosse gleich im demselbigen schwung / mit außgestreckten armen vbersich gegen seinem gesicht / dieweil als dann dein Spieß im eusserst flug ist / so wirdt er eilents (nach dem er deinem stoß entwichen) nachstossen / darumb zůcke dein hend noch hóher vber dein kopff / vnd sencke das vortheil deines Spieses vndersich / schlage jhm also seinen herfliegenden stoß mit hangendem Spieß zůr seiten auff solche form aus / wie dir dann solches das ober Bild zůr Rechten hand in der Figur M. anzeigt / erschwinge eilents deinen Spieß / vnd stoß ehe dann er sich erholt / nach.
Ein anders.
JTem fúhre deinen Spieß in der Oberhůt / vnd mercke in dem er herstoßt / so sencke das vorder theil / vnd schlage jhn abermals aus / vnnd vollende wie vor / Aus disem stuck seind vil andere stuck zůnemen / doch gehórt ein starck Mann darzů.
